कोल्हारची कन्या ‘शर्वरी पालवे’ झेप घेणार सातासमुद्रापार

• उच्च शिक्षणासाठी जर्मनीतील ब्रेमन विद्यापीठात निवड!

​ चिचोंडी शिराळ : जिद्द, चिकाटी आणि कष्टाच्या जोरावर ग्रामीण भागातील मुलेही आता जागतिक स्तरावर आपली मोहोर उमटवत आहेत. अहमदनगर जिल्ह्यातील कोल्हार गावची सुकन्या कुमारी शर्वरी संभाजी पालवे हिने अशाच एका यशाची उत्तुंग भरारी घेतली आहे. शर्वरीची उच्च शिक्षणासाठी जर्मनीतील नामांकित ब्रेमन युनिव्हर्सिटी येथे निवड झाली असून, ती आता अंतराळ विज्ञानाचे पुढील धडे परदेशात गिरवणार आहे.

बालपणापासूनचे ‘स्पेस’ स्वप्न झाले साकार:
​शर्वरीला लहानपणापासूनच आकाश, ग्रह-तारे आणि अंतराळ या विषयांची प्रचंड ओढ होती. केवळ आवड म्हणून न थांबता तिने जाणीवपूर्वक याच क्षेत्रात आपले करिअर करण्याचे ठरवले. तिने आपले पदवीचे शिक्षण पुण्यातील प्रतिष्ठित एमआयटी (MIT) पुणे येथून ‘स्पेस इंजिनिअरिंग’ या विषयात पूर्ण केले. पदवी शिक्षण पूर्ण केल्यानंतर आता ती पोस्ट ग्रॅज्युएशनसाठी (MS) जर्मनीला रवाना होणार आहे.

​जर्मनीतील ब्रेमन विद्यापीठात दोन वर्षांचा अभ्यासक्रम
​जर्मनीमधील ‘ब्रेमन युनिव्हर्सिटी’ हे अंतराळ संशोधनासाठी जागतिक स्तरावर ओळखले जाते. शर्वरी या ठिकाणी पुढील दोन वर्षे आपला पदव्युत्तर अभ्यासक्रम पूर्ण करणार आहे. तिच्या या निवडीमुळे कोल्हार गावाच्या शिरपेचात मानाचा तुरा रोवला गेला असून, ग्रामीण भागातील मुलींसमोर तिने एक नवा आदर्श उभा केला आहे. ​ चिचोंडी शिराळ मिरी तिसगाव कोल्हार पंचक्रोशीतून तिचे अभिनंदन होत आहे. तिच्या या निवडीबद्दल आणि भावी वाटचालीस शुभेच्छा देण्यासाठी परिसरातील मान्यवर पुढे आले आहेत. यामध्ये प्रामुख्याने ​प्रताप काका ढाकणे, अक्षय कर्डिले, बाळासाहेब अकोलकर,बाळासाहेब घोरपडे,​तुळशीदास शिंदे, अशोक टेमकर, भीमराव सोनवणे,अंबादास डमाळे,​बाबाजी पालवे, राणा प्रताप पालवे, भगवान फुलमाळी, राजेंद्र पाठक,​भरत राम पालवे, संतोष पालवे, जनताराम पालवे, विजय पालवे, शहादेव पालवे ​या सर्व मान्यवरांनी शर्वरीच्या जिद्दीचे कौतुक केले असून, तिने कोल्हार गावाचे नाव आंतरराष्ट्रीय स्तरावर उंचावल्याची भावना व्यक्त केली आहे.