माजी मंत्री शंकरराव गडाख पाटील यांची प्रत्यक्ष पाहणी
सोनई – माजी मंत्री शंकरराव गडाख पाटील यांनी मुळा सहकारी साखर कारखान्याच्या आगामी २०२६-२७ च्या गळीत हंगामाच्या पार्श्वभूमीवर सुरू असलेल्या दुरुस्ती व देखभाल कामांची प्रत्यक्ष पाहणी करून अधिकाऱ्यांना आवश्यक सूचना दिल्या. पुढील हंगाम पूर्ण क्षमतेने आणि कोणत्याही अडथळ्याशिवाय पार पडावा, यासाठी कारखान्यातील सर्व यंत्रसामग्री, इथेनॉल व डिस्टिलरी प्रकल्पांची वेळेत देखभाल करून घेण्याचे निर्देश त्यांनी यावेळी दिले.मुळा सहकारी साखर कारखान्याने मागील वर्षीच्या ४८ व्या गळीत हंगामात अवघ्या ११५ दिवसांत सुमारे ९ लाख ३० हजार मेट्रिक टन ऊस गाळप करून उल्लेखनीय कामगिरी केली होती. कारखान्यातील अत्याधुनिक आणि आधुनिक यंत्रसामग्रीमुळे दररोज सुमारे १२ हजार ५०० मेट्रिक टन ऊस गाळप करण्याची क्षमता उपलब्ध आहे.यंदा मान्सून समाधानकारक राहिला आणि ऊस उत्पादन चांगले झाले, तर आगामी गळीत हंगामात मुळा सहकारी साखर कारखाना तब्बल १५ लाख मेट्रिक टन ऊस गाळप करण्याचे उद्दिष्ट साध्य करेल, असा विश्वास शंकरराव गडाख पाटील यांनी व्यक्त केला. ऊस उत्पादक शेतकऱ्यांच्या हितासाठी आणि कारखान्याची कार्यक्षमता अधिक वाढवण्यासाठी व्यवस्थापनाने योग्य नियोजन केले असल्याचेही त्यांनी सांगितले.या पाहणीदरम्यान त्यांनी साखर कारखाना, इथेनॉल प्रकल्प तसेच डिस्टिलरी विभागाला भेट देऊन सुरू असलेल्या कामांचा आढावा घेतला. यंत्रसामग्रीची दुरुस्ती, सुरक्षा व्यवस्था, उत्पादन क्षमता आणि तांत्रिक सुधारणा याबाबत संबंधित अधिकाऱ्यांशी चर्चा करून आवश्यक सूचना करण्यात आल्या.यावेळी कारखान्याचे कार्यकारी संचालक शरद बेल्हेकर, चीफ इंजिनियर दीपक नवले, डिस्टिलरी मॅनेजर बाळासाहेब दरंदले तसेच विविध विभागांचे प्रमुख अधिकारी उपस्थित होते.मुळा सहकारी साखर कारखाना हा राज्यातील प्रगत आणि आधुनिक तंत्रज्ञानाचा वापर करणाऱ्या आघाडीच्या सहकारी साखर कारखान्यांपैकी एक असून, आगामी गळीत हंगामात विक्रमी ऊस गाळपाचे उद्दिष्ट पूर्ण करण्यासाठी व्यवस्थापनाने आतापासूनच जोरदार तयारी सुरू केली आहे.
