अंधश्रद्धेच्या काळोखावर प्रहार करणारी नवी कलाकृती

लोणी : ‘भोंदूची कमाल, पोलिसांची धमाल’ शॉर्ट फिल्म लवकरच प्रेक्षकांच्या भेटीलाआजच्या आधुनिक आणि विज्ञानवादी युगातही अनेकदा कठीण प्रसंगात माणूस हतबल होतो आणि याच हतबलतेचा फायदा काही तथाकथित भोंदू बाबा घेतात. समाजातील याच ज्वलंत प्रश्नावर बोट ठेवण्यासाठी निर्माते आबा निर्मळ आणि दिग्दर्शक प्रमोद निर्मळ ही जोडी ‘भोंदूची कमाल, पोलिसांची धमाल’ ही नवी शॉर्ट फिल्म घेऊन येत आहे. ‘श्री स्वामी समर्थ प्रचिती’ या त्यांच्या गाजलेल्या प्रकल्पानंतर ही जोडी पुन्हा एकदा एका सामाजिक विषयावर काम करत असल्याने चित्रपट वर्तुळात मोठी चर्चा सुरू झाली आहे. ही शॉर्ट फिल्म केवळ मनोरंजनासाठी नसून अंधश्रद्धा आणि भोंदूगिरीच्या विरोधात आवाज उठवणारा एक प्रभावी प्रयत्न आहे.या चित्रपटाच्या संदर्भात माहिती देताना निर्माते आबा निर्मळआणि दिग्दर्शक प्रमोद निर्मळ यांनी स्पष्ट केले की, अनेकदा मानसिक तणाव किंवा अपयशामुळे खचलेली माणसे बुवाबाजीच्या आहारी जातात. जर या भोंदूंकडे खरंच काही अलौकिक ज्ञान असते, तर त्यांना स्वतःला लोकांच्या घरोघरी जाण्याची गरज किंवा कोणत्यातरी ठिकाणी आपले बस्तान मांडण्याची गरजलागली नसती, हा विचार प्रत्येकाने करणे गरजेचे आहे. जग तंत्रज्ञानाच्या जोरावर पुढे जात असताना आपण अजूनही अशा जाळ्यात अडकणे ही खेदजनक बाब आहे. समाजामध्ये सुशिक्षित नागरिक सुद्धा अंधश्रद्धांच्या मार्गी चालतात या शॉर्ट फिल्ममध्ये एकीकडे भोंदू बाबा आणि त्यांच्याशी संबंधित गुंड प्रवृत्तीच्या लोकांचा काळा चेहरा उघड करण्यात आला आहे, तर दुसरीकडे पोलीस यंत्रणा कशा प्रकारे अशा गुन्हेगारांना धडा शिकवते, हे अतिशय दमदार शैलीत मांडले आहे. गरिबांना आणि अडचणीत असलेल्यांना फसवून पैसे उकळण्याचे प्रकार किती भयानक असू शकतात, याची जाणीव या चित्रपटातून प्रेक्षकांना करून दिली जाणार आहे.या चित्रपटाचा मुख्य संदेश ‘श्रद्धा देवावर ठेवा, भोंदूवर नको’ असा असून अंधश्रद्धा माणसाला अंधारात ढकलते, तर खरी भक्ती त्याला प्रकाशाकडे नेते, हे ठळकपणे अधोरेखित करण्यात आले आहे. देव हा केवळ मंदिरात नसून तो माणसामाणसात आहे आणि भक्तीमध्ये प्रचंड शक्ती असली तरी ती योग्य श्रद्धेनेच केली पाहिजे, असा विचार निर्माते-दिग्दर्शक जोडीने मांडला आहे. या शॉर्ट फिल्मला अधिक प्रभावी बनवण्यासाठी ज्ञानेश्वर साबळे, प्रमोद निर्मळ, ज्ञानेश्वर थोटे, ॲड. प्राजक्ता घोलप, मनीषा गुळवे, नरसिंहा सिंग, केशव पेहेरे, राजेंद्र पिंपळे आणि श्रीपाद बोकंद आणि विशेष सहकार्य वनिता ताई निर्मळ आणि मिनाथ निर्मळ सर यांसारख्या कसलेल्या कलाकारांनी आपल्या अभिनयाची जोड दिली आहे. प्रत्येक कलाकाराने आपल्या भूमिकेत जीव ओतून काम केल्यामुळे चित्रपटाची कथा अधिक जिवंत झाली आहे.एकूणच ‘भोंदूची कमाल, पोलिसांची धमाल’ ही शॉर्ट फिल्म समाजाला आरसा दाखवणारी आणि प्रेक्षकांच्या मनात घर करणारी ठरेल, असा विश्वास व्यक्त केला जात आहे. मनोरंजनासोबतच समाजप्रबोधनाचा हा प्रयत्न लवकरच प्रेक्षकांच्या भेटीला येणार असून त्याबद्दल लोकांमध्ये मोठी उत्सुकता निर्माण झाली आहे. जागे व्हा, विचार करा आणि भोंदूगिरीपासून दूर राहा, हा एकच मोलाचा संदेश ही फिल्म सर्वांपर्यंत पोहोचवणार आहे. शिर्डी प्रतिनिधींच्या माध्यमातून ही माहिती समोर आली असून या सामाजिक उपक्रमाचे सर्वत्र कौतुक होत आहे.