सोनई : सोनई येथील ब्रम्हाकुमारी विश्व विद्यालयाच्या ओमशांती केंद्रात उन्हाळी सुट्टीच्या निमित्ताने घेण्यात आलेल्या बाल व्यक्तीमत्व विकास व संस्कार शिबीराची सांगता उत्साहात झाली. सहा दिवसीय शिबीरात नैतिकमुल्य आणि आनंदी जीवनशैली बरोबरच आरोग्य, पर्यावरण व व्यक्तीमत्व विकासाचे धडे चिमुकल्यांना देण्यात आले.
ओमशांती केंद्राच्या प्रमुख उषादिदी यांनी शिबीरात घेण्यात आलेल्या उपक्रमांची माहिती देऊन केंद्राच्या माध्यमातून वर्षभर राबविण्यात येत असलेल्या सामाजिक व धार्मिक कार्यक्रमांची माहीती दिली. सामाजिक कार्यकर्ते शिवाजी बाफणा,डाॅ. योगेश वाघ व आनंदवन सेवाभावी संस्थेचे उपाध्यक्ष विनायक दरंदले यांच्या हस्ते शिबीरातील गुणवंत विद्यार्थ्यांना बक्षीसांचे वाटप करण्यात आले. ओमशांती परिवारातील भाई व बहिणींनी विविध खेळ, गीत व संस्काराचे धडे दिले. शिवाजी बाफणा परिवाराच्या वतीने सर्वांना मिठाई तर डाॅ. वाघ यांच्या वतीने शालेय साहित्य देण्यात आले. अनिलभाई गडाख यांनी आभार मानले.
