नेवासा तालुक्यात अवैध वाळू वाहतुकीवर प्रश्नचिन्हांची सरबत्ती; प्रशासन नेमकं काय करतंय?

नेवासा : नेवासा तालुक्यात अवैध वाळू उपसा आणि वाहतुकीचा मुद्दा दिवसेंदिवस गंभीर होत असताना सर्वात मोठा प्रश्न समोर येतोय — प्रशासन नेमकं करतंय तरी काय? नदीपात्रातून उघडपणे वाळू काढली जात असताना आणि ती विनानंबर, मोडकळीस आलेल्या वाहनांतून रस्त्यावरून भरधाव नेली जात असताना संबंधित यंत्रणा कुठे आहे, असा थेट सवाल नागरिकांकडून उपस्थित केला जात आहे.
रस्त्यावर दिवसभर तपासणी करणारे प्रादेशिक परिवहन विभागाचे अधिकारी या संशयास्पद वाहनांकडे दुर्लक्ष का करतात? नियमांनुसार वाहनांची तपासणी, कागदपत्रांची पाहणी आणि कारवाई करण्याचा अधिकार असताना ही वाहने सहजपणे कशी सुटतात? पोलिसांची गस्त असतानाही या वाहनांचा वेग कमी का होत नाही? हे सर्व प्रश्न आता उघडपणे विचारले जात आहेत.
विशेष म्हणजे, या वाहनांमुळे अपघाताचा धोका वाढत असताना नागरिकांच्या जीविताची जबाबदारी कोण घेणार? एखादी दुर्घटना घडल्यावरच प्रशासन जागं होणार का? की आधीच ठोस कारवाई करून धोका टाळता येणार नाही का? अशा तीव्र प्रतिक्रिया स्थानिकांकडून समोर येत आहेत.
नदीपात्रांची अक्षरशः लूट सुरू असताना महसूल विभाग कुठे आहे? पर्यावरणीय नुकसानाची जबाबदारी कोण स्वीकारणार?
दरम्यान, नव्याने नियुक्त अधिकाऱ्यांकडून कडक कारवाईची अपेक्षा व्यक्त होत असली तरी प्रत्यक्षात काही बदल दिसणार का, हा प्रश्न कायम आहे. नेवासा तालुक्यातील नागरिक आता केवळ उत्तरं नाही, तर ठोस कृतीची वाट पाहत आहेत.